الفرق بين هجمة التصلب المتعدد والهجمة الكاذبة والاعراض العابرة وكيف نعالجهم
- Dr Abdelrahman Mohamed
- 10 hours ago
- 3 min read
ايه هي هجمة التصلب المتعدد وازاي نفرق بينها وبين الهجمة الغير حقيقية ، وبين الاعراض العابرة ؟ وازاي نعالجهم ؟
معظم مرضى التصلب المتعدد MS بيكونوا من نوع او مرحلة الms الانتكاسي المتكرر RRMS (٨٥% من المرضى فالنوع دا)
ودا بيتميز بوجود هجمات بتحصل او نشاط للمرض يعقبه فترات هدوء
ف مهم نعرف ايه هيا الهجمة
-عشان لو حصلت نتعامل معاها
- و عشان لو حد سليم حصلتله الاعراض بالوصف دا يلحق يتشخص لو كان في بداية ال ms او اللي بنسميه المتلازمة المعزول اكلينكيا CIS ..
- إيه هي الهجمة ؟
الهجمة هي اعراض عصبية جديدة بتحصل للمريض بتستمر عالاقل فترة ٢٤ ساعة
في غياب اي سبب اخر للاعراض زي العدوى وارتفاع الحرارة
------------
□طيب ايه هي الهجمة الكاذبة او الغير حقيقية ؟.
هي اعراض عصبية مشابهة لاعراض قديمة موجودة لهجمات سابقة في غياب نشاط حقيقي للمرض
اشهر الحجات اللي تؤدي الي هجمات غير حقيقية :
العدوى ، التهابات الجهاز التنفسي ، الضغط العصبي ،ارتفاع درجة الحرارة او التعرض لدرجات حرارة عالية ،
والحل اننا نعالج العدوى، نستريح وندي الجسم الفرصة للتعافي ونقيم الاعراض تاني
يعني لو اعراض هجمة حصلت بعد نزلة برد او سخونية بتبقى مش هجمة
□الاعراض العابرة :
هي اعراض مفاجئة ،مؤقتة بتقعد ثواني او دقايق وممكن تتكرر كتير خلال اليوم بنمط متكرر (ممكن ١٠ مرات او اكتر)
من اشهر اسباب الاعراض دي
التهاب العصب الخامس(احساس زي لسعات مؤلمة فالفك)، التقلصات العضلية ، ازدواج فالرؤية لفترة مؤقتة ,احساس مؤقت بعدم الحركة او التنميل
لما الأعراض دي تحصل لوحدها ومتبقاش مستمرة مش بتبقى هجمة وانما نتيجية لوجود تاكل فالمايلين مع المرض فبيسبب لخبطة فالاشارات العصبية تؤدي للاعراض
الحل:نكشف وناخد ادوي تعالج الاعراض الموجودة زي مثلا ادوية تحسين الالم(زي جابتن او تيجريتول ) والادوية المحسنة للتوتر والقلق (زي سيمبالتا ) واو ادوية تحسين النوم(زي تريبتزول )
----------------
●طيب الهجمة الحقيقة اعراضها ايه ؟
٧٥%من الهجمات بتبقى ليها اعراض واحدة مش كذا عرض مع بعض
ايه هي اشهر اعراض الهجمات ؟
عدم الاتزان ,تقل في الحركة ف احد الجانبين ،التنميل في احد الجانبين
ضبابية الرؤية،مشكلة في التحكم في البول
بعض الهجمات ممكن تكون هجمات فشكل ارهاق شديد او مشاكل ادراكية او معرفية حادة (يعني لخبطة فالافكار او التركيز )
مش شرط لو حصلت هجمة . تكون في بؤر جديدة فالمخ او النخاع
ومش شرط لو عملنا رنين بالصبغة وقت الهجمة تبان بؤر نشطة (الرنين بالصبغة بنستخدمه لتحديد لو كان في بؤر نشطة)
الهجمة لو حصلت باعراض معينة في احتمال ٧٠% انها ممكن تتكرر بنفس الاعراض تاني
●طيب ايه علاج الهجمات ؟
علاج الهجمات زي ما عارفين هو الكورتيزون
جرعات وريد من الكورتيزون (ميثيل بردنزيلون ) من ٣ ل ٥ ل ٧ ل ١٠ ايام حسب حدة الهجمة
في بعض الهجمات الحسية او البسيطة ممكن ناخد جرعات كزرتيزون من حقن عضل او وريد ونتابع لو الاعراض هتتحسن ولا هنحتاج جرعات سوليمدرول وريد
الكورتيزون بيقلل من التاثير الحاد فالتهاب فالاعصاب تدريجيا
ف مش شرط اعراض الهجمة تتحسن اول ما نعلق الكورتيزون ممكن تتحسن بالتدريج فخلال شهر
ف ممكن نستنى لو الاعراض بدات تتحسن ونقيم بعدها
في الهجمات القوية الغير مستجيبة لجرعات الكورتيزون . ممكن نلجأ لاجراء تاني زي فصل البلازما
طبعا عدم حدوث الهجمات لفترة طويلة دليل كويس على الاستجابة للعلاج
وبرضه حدوث هجمات كثيرة متكررة ففترات قليلة او باعراض قوية دليل على نشاط المرض وممكن نحتاج ساعتها نغير الدوا المناعي
ونخلي بالنا اثناء تعليق الكورتيزون
يكون التعليق الصبح ..
مننساش قبله دواء واقي لجدار المعدة
و مضاد للحساسية ..
والكالسيوم والبوتاسيوم اثناء اليوم لمنع حدوث اعراض جانبية من نقصهم اثناء الجرعات
قياس السكر بانتظام (خصوصا في مرضى السكر) ،قياس الضغط
ناخد الدواء على عدد ساعات اكبر لو حصلت مشاكل اثناء التعليق
وفي شوية اعراض جانبية اخرى ممكن تحصل اثناء تعليق الكورتيزون
زي الارق ،الحبوب ،الاعراض الاكتئابية ،التغيرات في الجسم(الانتفاخ) وهتتحسن ان شاء الله بعد انتهاء الجرعات بالتدريج
الخلاصة
اسال نفسك ٣ اسئلة
●هل اعراض حديثة وثابتة اكتر من ٢٤ ساعة
●هل الاعراض دي بعد ارهاق قوي او تعرض لدرجات حرارة (لو نعم نستريح ونتابع الاعراض)
●هل في نزلة برد او سخونية او عدوى (لو نعم نعالج العدو الاول )
لو نعم ، لا ،لا ، تبقى هجمة
الفرق بين هجمة التصلب المتعدد والهجمة الكاذبة والاعراض العابرة وكيف نعالجهم
Comments