كل المعلومات عن اجراء فصل البلازما Plasma Exchange
- Dr Abdelrahman Mohamed
- 9 hours ago
- 2 min read
ايه هو اجراء فصل البلازما ومين ممكن يحتاجه ؟
فصل البلازما هو اجراء تداخلي بنعمله داخل المستشفى لتنقية الدم من الاجسام المناعية المضادة الموجودة فالدم والمسببة للاعراض و المشكلة المناعية
ازاي بيتم فصل البلازما ؟
قبل فصل البلازما طبيب التخدير بيركب جهاز زي كانيولا كبيرة (ماهوكر) فالاوردة الرئيسية (زي اللي فالرقبة )عشان يخرج ويدخل من خلاله الدم(الاجراء بيتم ببنج موضعي او تخدير كامل ) من ربع ل نص ساعة وبعد كدا بنقوم بعمل جبسة فصل البلازما
الدم بيخرج عن طريق الماهوكر ويدخل جوا الجهاز بيتم من خلاله فصل البلازما والاجسام المضادة عن بقية مكونات الدم وبيتم خلطهها بالالبيومين وبلازما تانية وعودتها مرة تانية للجسم
الجلسة بتستغرق من ساعتين ل ٤ ساعات
بنحتاج كام جلسة ؟
من ٣ ل ٦ جلسات (يوم بعد يوم) او ٣ جلسات اسبوعيا حسب الاعراض وممكن توصل ل ١٠ جلسات حسب الحالة والاعراض
امتى بنعمل جلسات فصل البلازما ومين المريض اللي ممكن يحتاجه الاجراء ؟
-مريض الms الانتكاسي المتكرر اللي عنده هجمة قوية مؤثرة (زي هجمات العصب البصري والحركة )غير مستجيبة للكورتزيون يعني اخدنا من ٧ ل ١٠ جرعات كورتيزون ومتحسناش عليها خالص او الاعراض بتزيد او في مانع لأخذ الكورتيزون
-مريض ادمADEM غير مستجيب للكورتيزون
-مريض التهاب النخاع و العصب البصري NMO او MOGAD غير مستجيب للكورتيزون
-مريض التهاب النخاع الشوكي المستعرض غير مستجيب للكورتيزون
-مريض جيليان باريه Gbs عنده اعراض حادة وحديثة
-مريض وهن العضلات مع وجود اعراض هجمة وخصوصاضعف فعضلات التنفس والبلع
-مريض التهاب الاعصاب CIDP غير مستجيب للكورتيزون
الاحتياطات
مهم جدا جدا نعمل فصل البلازما ف مستشفى يكون في متابعة طبية كويسة يعني دكتور متواجد وتمريض حوالين المريض وبيتابع العلامات الحيوية وبيعمل الجلسة ف وقت مناسب حسب حالة المريض
مهم الحفاظ على نظافة وتعقيم الماهوكر (في ناس بيحصلها عدوى من خلاله وسخونية وبتضطر توقف الجلسات وتشيله)
مهم نشرب سوايل كويس فاليوم (عالاقل ٨ كوبايات)
ناكل كويس قبل الجلسة ب ساعة
قبل ما نبتدي بنعمل تحليل صورة دم وسيولة وكالسيوم وصوديوم وبوتاسيوم وفيروسات كبدية
الاعراض الجانبية المحتملة
بعض مرضى مع الجلسات ممكن :
-الضغط يقل
- الاحساس بالدوار
-الارهاق الجسدي
-الاحساس بالتنميل وبرودة الاطراف
سعر الجلسة
في بعض المستشفيات الحكومية بمصر سعر الجلسة في حدود ١٠٠٠٠ جنيه
كل المعلومات عن اجراء فصل البلازما Plasma Exchange
Comments