كل المعلومات عن عقار مافنكلاد Mavenclad

Dr Abdelrahman Mohamed
Sep 12, 2025
2 min read

Updated: Dec 9, 2025

ما هو عقار مافنكلاد ؟ الدوا اسمه مافنكلاد (كلادربين )

عبارة عن أقراص بياخدها المريض على مدار ٢٠ يوم بس ف اربع سنين (مفعولها بيغير المناعة بشكل مستمر فالاربع سنين دول )

ال ٢٠ يوم متقسمين ازاي

١٠ ايام اول سنة (٥ ايام في الشهر الاول من بداية الدوا و ٥ ايام في الشهر اللي بعده - باقي السنة من غير دوا مناعي )

في السنة التانية (٥ ايام في الشهر الاول بعد مرور سنة من اول جرعة و ٥ ايام في الشهر اللي بعده - باقي السنة من غير دوا مناعي والسنة التالتة والرابعة برضه بدون دوا )

عدد الاقراص اللي المريض هياخدها بتتحسب حسب وزنه زي اللي فالصورة (كل ما الوزن زاد عدد الاقراص اللي هيحتاجها هتزيد )

يجب عمل التحاليل الآتية قبل بدء الدوا

للاسف مفيش برنامج دعم للدوا بيغطي تكلفة التحاليل

◇صورة دم CBC

عدد ال lymphocytes فيها لازم يبقى طبيعي و ميقلش عن ١٠٠٠

●الناس اللي هتحول للدوا من عقار زي فينجليمود (سفينجمود) تخلي بالها عشان بيكون عندها النسبة دي قليلة ف بتحتاج وقت تبطل فيه دواها قبل ما تنقل ليه عشان النسبة تزيد ●

◇ وظايف كبد و تحليل فيروس بي وفيروس سي سلبي

Alt, ast ,HBsag ,HCV ab

◇تحليل الإيدز HIV

◇تحليل الدرن quantiferon tb

تحليل الجدري varicella zoster ولازم يكون في مناعه مزمنة منه او المريض ياخد اللقاح قبل بداية الدوا

●المرضى اللي كانوا بياخدوا عقار فينجليمود - كانوا عاملين التحليل دا قبل ما يبدأوا فيجهزوه ●

وطبعا لازم ميبقاش في لاقدر الله اي اورام نشطة

الحمل والرضاعة مش مسموح اثناء اخذ الدوا (مسموح بالتخطيط للحمل بعد جرعة السنة الثانية ب ٦ شهور )

-بنتابع الدوا بصورة دم بعد جرعة الشهر التاني وكل ٦ شهور

مع عمل الرنين للمتابعة عالمخ والفقرات كل ٦ اشهر

-بعد انتهاء الاربع سنين بتوع الدوا بنقيم حالة المريض تاني وبنشوف لو محتاج يكمل على نفس الدوا تاني او ادوية اخرى

-الدواء مرشح لأخذه مرضى التصلب الانتكاسي المتكرر بانواعه Relapsing Remetting MS