مرض التهاب العصب البصري والنخاع او الNMO

Dr Abdelrahman Mohamed
Sep 12
3 min read

Updated: Oct 8

ماهو مرض التهاب العصب البصري والنخاع او الNMO ؟ المرض المظلوم إعلاميا وطبيا للاسف

مع انه مرض من الامراض المناعية المزمنة المشابهه للMS

و حوالي ٤٠% من المرضى المصابين بيه ممكن يتشخصوا غلط ك MS

الNMO مرض بيؤثر على اعصاب العين وبيعمل بؤر مميزة فالنخاع الشوكي وممكن يعمل بؤر فالمخ غير بؤر الms

كمان بيعمل هجمات متكررة مابينها فترات ثبات

من اشهر اعراضه :

زي اسمه التهاب العصب البصري اللي بيبدا بضبابية فالعين فعين واحدة او الاتنين (من الحجات المميزة انه يحصل فالعينتين) وتغيير فالالوان او الم شديد فالعين

وممكن طبعا تحصل معاه هجمات و اعراض زي التصلب المتعدد او اعراض زي الضعف والتنميل ومشاكل التحكم فالبول وتخشب العضلات

طيب ازاي بيتشخص :

1- الفحص الاكلينيكي والتاريخ المرضي لشكل الهجمات ونوعها عادة بتكون هجمات الnmo اقوى فالاعراض من الms

كمان في اعراض مميزة زي الزغطة بشكل مستمر او احساس القئ والترجيع و نوبات النوم المفاجئ

2-الاشعة :

اشعة عالمخ والنخاع الشوكي للفقرات العنقية والصدرية من الحجات المهمة وتكون واضحة وف مكان كويس دايما بقول ان استثمار المريض ف جودة الاشعة من الحجات اللي هتوصله للتشخيص السريع

وبالبرتوكول دا

Mri brain (sagital flair )and cervicodorsal spine(STIR)

في كتير من المرضى بيعمل رنين عالمخ بس او عالفقرات للعنقية بس ودا طبعا مش كافي لاستبعاد المرض

عشان شكل بؤر الNMO بتبقى مميزة ف النخاع الشوكي بتبقى بؤر طولية اكتر من مسافة ٣ فقرات وفنص النخاع الشوكي غير بؤر الms بتبقى صغيرة ومتقطعة فالجزء الخلفي من النخاع الشوكي

وكمان بؤر المخ ممكن متبقاش موجودة او بيبقى شكلها مختلف عن شكل بؤر الms العادية وممكن يكون فمراكز معينة فجزع المخ

رنين العصب البصري

معظم اصابات التهاب العصب البصري ومرض تاني شبهه اسمه MOG بتبقى فالعينين مش عين واحدة

اصابات الms للعصب البصري بتبقى فعين واحدة أكتر

شكل اصابات العصب البصري

بتبقى غالبا واخد اجزاء كتير من العصب نفسه اكتر من نص طوله

وممكن تكون الاصابات فاجزاء من مسار العصب الخلفي الاقرب للمخ

اسم اشعة الرنين عالعصب البصري بالصبغة

Orbit MRI (T1,T2 fat suppression with gadolinium enhancment thin cut 1-3 mm )

٣-تحليل اكوا بورين ٤ AQP4

ودا تحليل بيتعمل من الدم بندور في على اجسام مناعية معينة

بيكون ايجابي ف ٧٠ فالمية من الحالات

و ٣٠% من الحالات ممكن التحليل يبقى سلبي ولكم عندهم المرض فبنعتمد عليه لو ايجابي لكن لو سلبي بنعتمد على بقية الخطوات فالتشخيص

اسم التحليل الادق بالصيغة دي

Aquaporin 4 ab (cell based assay )

يفضل نعمله طبعا في معمل موثوق

والتحليل بيتأثر بالكورتيزون فلازم نعمل بعد شهر من اخر جرعات كورتيزون

العلاج

-علاج الهجمات زي ال ms بالظبط بالكورتيزون

(يارب السوليمدرول يرجع يتوفر تاني )

او فصل البلازما لو محصلش تحسن بالكورتيزون

-العلاج الاساسي

المتوفر ف مصر حاليا هو الريتوكسيماب (المابثيرا)

محلول بيتعلق فالمستشفى كل ٦ شهور - اول جرعة متقسمة على مرتين بينهم اسبوعين ثم كل ٦ شهور

بنعمل قبله

Cbc- alt -ast- Hbsag -hcv ab

واشعة مقطعية عالصدر او تحليل درن

و في اكتر من دوا واخد الموافقات على استخدامه فعلاج الnmo زي

ravulizumab متاح ف مصر للتأمين الخاص بس لسه مش فالنفقة او التامين الصحي

eculizumab متاح خارج مصر

الخلاصه

نبتدي نشك فالتهاب العصب البصري لو معظم الاصابات عالعينتين او في بؤر فالنخاع طويلة زي اللي فالصور .. او في تحليل اكوابورين ايجابي .. او فحوصاتك مش ماشية خالص مع الms زي ان رنين المخ يبقى طبيعي بس في بؤر فالنخاع او البذل سلبي بس في بؤر

(ملحوظة ممكن البذل يبقى ايجابي ف ١٥ % من مرضى الNMO)

عشان كدا مهم الفحص والتاريخ المرضي والاشعة يتحطوا جمب بعض ونقرر

للكشف وتقييم الحالة أونلاين إضغط هناِ