ازاي دكتور المخ والأعصاب بيختار الدوا المناعي لمريض التصلب المتعدد MS ؟؟

ازاي دكتور المخ والأعصاب بيختار الدوا المناعي لمريض التصلب المتعدد MS ؟؟

فالبداية مفيش دوا مناعي حلو و دوا وحش ولكن في دوا مناسب لحالة ونوع الms فالمريض ودوا اخر مش مناسب

واختيار الدوا المناسب بيحقق للمريض وقف نشاط المرض وثبات البؤر او تراجعها وتحسن الحالة الصحية

الحقيقة عوامل اختيار الدوا مش سحر او متسابة ل اهواء الطبيب

ولكن في عوامل علمية كتيرة بيقدر من خلالها الدكتور يختار الدوا المناسب ويتوقع بنسبة كبيرة التحسن عليه (بالظبط زي تفصيل الهدوم )

وياريت اي مريض هيبتدي دوا مناعي او هيغير الدوا يناقش مع الطبيب المعالج اسباب اختياره للدوا والبدائل المتاحة

بعض العوامل اللي بنختار منها

▪︎النوع

ممكن يفرق الدوا اللي بنختاره لو المريض ذكر او انثى

حتى لو الاتنين نفس المرحلة

مثلا الدراسات اثبتت ان الذكور ممكن يكون مسار المرض اقوى من الاناث بالإضافة للنقطة التالية

▪︎التخطيط للحمل والرضاعة

للاناث بعض الادوية مناسبة للحمل زي الانترفيرون والتيسابري وبعضها مناسبة للرضاعة زي الانترفيرون فقط

عشان كدا لو في مريضة بنختارلها دوا و بتخطط للحمل او بترضع دا بيخلينا نختار من الادوية دي بس حسب نشاط للمرض

او نختار دوا اخر ونغير للادوية قبل التخطيط للحمل

بالنسبة للذكور دوا واحد (تريفلوميد (اوباجيو او بيكسوناميد))

دا اللي لازم يقف قبل التخطيط للانجاب

▪︎طريقة استخدام العلاج للمريض

زي ما احنا عارفين في ادوية اقراص وحقن ومحاليل

اكيد لو مريض عنده فوبيا من الحقن او معروف عنه انه غير ملتزم بالاقراص هيخليني اختار طريقة ملائمة واضمن ان المريض يستمر عالدوا المناعي ويستفيد منه

▪︎السن

من العوامل اللي بنختار بيها مثلا تحت سن ال ١٨ سنة في ادوية معينة فقط بنختار منها زي الفنجوليمود

وبعض الادوية مع السن الكبير ووجود تاريخ مرضي لاورام او ما شابه بيخلينا نختار ادوية بمواصفات امنة مع المتابعة الدورية

والدراسات برضه وضحت ان فوق سن ال ٤٠ مسار المرض ممكن يكون مختلف

وان المرضى فالسن الصغير بتكون اعراض المرض مش متماشية مع حجم الاصابات لحيوية خلايا المخ فالسن دا

▪︎توفر الدوا وتكلفته والتامين الطبي للمريض

اكيد من المنطقي اختيار دوا موجود والمريض يقدر يصرفه من جهة تامينه

لان بعض الادوية متاحة على نفقة الدولة والتامين الصحي وبعضها فالتامين الصحي فقط

وفي بعض البدايل موجودة فالقطاع الخاص لسه مدخلتش التامين او النفقة

برضه بعض الادوية عالية التكلفة ققد تكون هناك بدائل اخرى تحقق نفس النتيجة

▪︎حجم الاصابات واماكنها فالمخ وعددها ونشاط المرض

بعض البؤر في بعض الاماكن زي جذع المخ او بؤر النخاع الشوكي بتوجهنا لاختيار ادوية من نوع اخر تقدر تسيطر على البؤر

برضه وجود ضمور شديد فالمخ او بؤر نشطة بالصبغة او بؤر جديدة اكيد بيوجههنا لتغيير العلاج

▪︎نوع الMS

الا ام اس انماط زي الانتكاسي المتكرر او التقدمي الاولي او الثانوي كل نوع من دول ليهم ادوية معينة تناسبهم اكتر من النوع الاخر

مثلا التقدمي الاولي مرشح انه ياخد عقار اوكريليزوماب (اوكريفس ) اكتر من الادوية الاخرى

▪︎ الهجمات عددها وشدتها :

زي ما قولنا قبل كدا ٨٥% من المرضى من نوع ال ms الانتكاسي المتكرر

على الرغم من كدا بعض المرضى بيختبروا هجمة واحدة في بداية للمرض

والبعض الاخر بتجيله هجمة او اتنين او اكتر كل سنة ودا اكيد بيوجههنا نختار ادوية من نوع مختلف للمريض ذو الهجمات المتكررة او الشديدة

ازاي نعرف ان في هجمة ms

▪︎مقياس درجة الاصابة ،الفحص الاكلينيكي

اكيد فحص المريض وحالته الصحية من العوامل المهمة للاختيار

مثلا المريض لو فبداية المرض ولكن في مشكلة فالمشي او صعوبة فالتحكم فالبول او مشكلة بالاعصاب دا بيخلينا نختار ادوية تقدر تسيطر عالاعراض دي غير لو المريض مش بيشتكي من اعراض خالص

▪︎استراتيجية الدكتور في اختيار العلاج

هل بيميل لاختيار حلول امنه ويستنى اما يحصل تطور للمرض او هجمات واصابات فالمخ وبعد كدا يغير الدوا

ام هيختار يبتدي ب احسن دوا مناسب لحالة المريض (دي الاستراتيجية المفضلة لتقليل الاصابات وتقدم المرض )

▪︎درجة الامان من الدواء (الفائدة مقابل الضرر) والاعراض الجانبية

اختيار ادوية لمراحل متقدمة من التصلب المتعدد بيصاحبه وجود عوامل خطورة حسب الدوا

مثلا ان بعض الادوية بتعمل تقليل ل كرات الدم البيضا او المريض ممكن يحتاج يعمل فحوصات للفيروسات او فحص الثدي للسيدات كل ٦ اشهر اذا كان هناك تاريخ مرضي للاورام

وبرضه ممكن يكون الدوا مناسب وكل حاجة لكن المريض بدأ يحصله اعراض جانبية زي ارتفاع وظايف الكبد او الانخفاض الشديد لكرات الدم البيضا ودا بيخلينا نغير الدوا

وفالنهاية الدكتور بيقيم كل العوامل دي وعلى اساسها بيقرر الدوا المناسب للتصلب المتعدد ازاي دكتور المخ والأعصاب بيختار الدوا المناعي لمريض التصلب المتعدد MS ؟؟

للكشف وتقييم الحالة أونلاين إضغط هناِ

#تصلب_متعدد

#MultipleSclerosis

#multiplesclerosisawareness

#MS