بذل النخاع الشوكي والتصلب المتعدد
- Dr Abdelrahman Mohamed
- Sep 12
- 3 min read
Updated: Oct 8
ف وسط مالمريض بيتلقى خبر ان عنده تصلب متعدد وبعد رحلة من اللف عالدكاترة وعمل الاشعات سعات الطبيب المعالج بيفاجئه بطلب تحليل عينة من النخاع الشوكي وميبقاش في معلومات كافية عن سبب البذل او بدايله
طب ايه هو التحليل ؟
التحليل اللي بنطلبه للمرضى هو
CSF OLIGOCLONAL BANDS AND IgG INDEX WITH ISO ELECTRIC FOCUSING Technique
هي عينة بناخدها بابرة من ال نخاع شوكي بتتسحب من اسفل الضهر بين الفقرات
وبناخد معاها عينة عادية من الدم كمان
الاجراء ممكن يتعمل ف غرفة معقمة عادي او ف غرفة عمليات ببنج موضعي او كلي
وممكن يتعمل والمريض جالس او نايم
■هل هي حاجة مؤلمة ؟؟
الاجراء نفسه فالمجمل لا بس .. ممكن ما قد يصاحبه من صداع بعدها يكون مزعج وهقول فالاخر ازاي نمنع دا ونتجنبه
سحب العينة المفروض بتبقى شكة بسيطه جدا حسب مهارة الطبيب ممكن تبقى شكة واحدة او اكتر وحساسية المريض للالم بتختلف من حد للتاني بس معظم الناس بتحس بتاثير الشكة فقط (زي شكة تحليل الدم )
وممكن وضع بنج موضعي (لكنه بيكون شكات متعددة اخرى تحت الجلد وبرضه المريض ممكن يحس بالم بسيط ) وفي ناس بتعمله ببنج كلي بتخدير كامل حسب تفضيل المريض
وبنسحب بعدها عينة حوالي ٦ سم وبعد كدا بتتشال الابرة فسعتها
■هل الاجراء بياخد وقت طويل ؟
الاجراء نفسه لو تم بشكل صحيح وسلس ممكن ياخد دقايق معدودة
■طب ايه هوا البذل الايجابي ؟
بندور فالسائل على وجود خلايا مميزة (بروتين) داخل النخاع الشوكي مش موجودة زيها فالدم (يعني مصدرها المخ فقط بما ان التصلب المتعدد مصدره الجهاز العصبي بس )ولازم تكون خليتين مميزتين او اكتر
ودا ليه شكلين
-Type 2
خلايا مميزة في سائل النخاع الشوكي فقط
Type 3
او خلايا مميزة فالنخاع الشوكي فقط معاها خلايا عادية موجودة فالنخاع والدم
لو في خلايا عادية موجودة فالدم والنخاع الشوكي زي بعض بدون وجود خلايا مميزه بنعتبره بذل سلبي للتصلب Type 4 لكنه يدل على وجود خلل فالمناعة
وجود خلية واحدة بس مميزة فالنخاع الشوكي بنعتبره سلبي برضه
■امتى الدكتور بيحتاج بذل النخاع ؟؟
•استكمال تشخيص ال ms
عشان نشخص التصلب المتعدد المريض لازم فالمجمل تحصله هجمتين و بؤر ليها شكل ومواصفات معينة ف مكانين مختلفين فالمخ او النخاع الشوكي
طب لو مريض حصله هجمة. واحدة هل بخليه يستنى تحصله الهجمة التانية ؟
او لو مريض محصلوش هجمات بس باين علامات شبه ال ms فالاشعة(المتلازمة المعزولة اكلينكيا CIS) او البؤر مش مميزة بالشكل الكافي وعايز اتاكد هل بستنى الهجمة تحصل ؟
اكيد طبعا لا
وهنا بييجي دور عينة النخاع الشوكي لتاكيد التشخيص وقطع الشك باليقين
•التفرقة بين ال MS والامراض الشبيهة
سعات البؤر والتاريخ المرضي مش بيبقى حاسم للمرض انه تصلب متعدد او حاجة شبيه زي التهاب العصب البصري او التهاب الاوعية الدموية
وهنا ممكن بذل النخاع الشوكي يساعدنا فالتفريق
■هل في بديل للبذل ؟
بالنسبة لو في شك انه تصلب متعدد (او محتاجين نكمل المواصفات ) او لو كان شك انه CIS
التوصيات الجديدة بتقول ممكن نستبدل البذل برنين بيتعمل ب طريقة ادق وبندور فيه على شكل معين من علامات وجود البؤر
بندور في فالمخ على شكل علامات معينة فالمخ central vein sign & para magnetic rim lesion وجودها بيؤكد وجود التصلب المتعدد
الرنين بالطريقة دي (موجود ف مراكز اشعة محدودة ف مصر حاليا )
●لو علقنا سوليمدرول قبل البذل مش هيأثر عالنتيجة خالص (بس يارب السوليمدرول يرجع يتوفر تاني )
●نحرص اننا نحلل التحليل ف مكان كويس وثقة لانه سعات بيكون مصيري فالتشخيص واثبات مهم ونحتفظ يالنتيجة عشان متضيعش ف نفس الورق
■تعليمات قبل البذل
مش لازم صيام لو مش هيتعمل ببنج كلي
لو بناخد اسبرين برضه مفيش مشكلة
■تعليمات بعد البذل
الراحة مستلقيا على سرير بدون مخدة من ساعة البذل (حتى لو مفيش اي اعراض ) لحد ممكن لمدة اسبوع
شرب ٣ لتر ماية يوميا
شرب قهوة
ممكن للالم بنادول اكسترا كل ٨ ساعات و باسط عضلات لو في شد عضلات جامد
وراد يحصل صداع او شد فاسفل الراس بعد البذل ب ايام ودا طبيعي هناخد المسكنات والادوية. من اول يوم عادي خالص
نتجنب التحميل على الضهر او الحزء جامد
■استخدامات اخرى للبذل فالمخ والاعصاب غير ال ms
-قياس ضغط سائل المخ في حالات زيادة ضغط المخ او ارتشاح العصب البصري
-تحليل السائل نفسه عشان نشوف لو فيه بروتين كتير او كرات دم بيضاء في بعض الامراض الاخرى
ياريت لو حد عمل بذل وكان سلس يطمن بقية المرضى مش يخوفهم بذل النخاع الشوكي والتصلب المتعدد
Comments